但係咁忍法, 狗都有火, 話說阿仔尋日趁我地沖涼果時, 係茶几度銜左成大舊芝士火腿包落地慢慢嘆, 唉....再唔開爐整零食, 我真係怕佢有進一步行動.
雖然屋企無波睇, 為左狗地都能夠感受下世界杯既氣氛, 所以今次整d波餅佢嘆, 一如以往, 街市超市見乜平靚正就係佢地餅餅既材料.
登登登登....望穿秋水....等到狗頸都長既....
蒜香三文魚西蘭花燕麥波餅.
做法 : 先將西蘭花及少量蒜頭搗碎, 再加入三文魚同雞蛋. 分量隨意.
如果你既小朋友唔挑食, 咁咪多菜少魚; 如果你既小朋友好似仔仔咁係食肉獸, 咁就要重手d落三文魚啦.
搗埋一埋之後, 再加入適量既燕麥, 肉同燕麥既比例亦要就返狗狗既胃口同體型. 但係留意餅團唔可以太軟.
搓成波波之後就上粉. 焗出黎外面就會脆卜卜. 仔仔唔食硬野, 外脆內軟就岩曬佢胃口.
之後就鋪係搽左油既焗盤度
入爐之前俾豬仔過下目先.
仔仔 : 好香, 快d入爐.
豬豬 : 我會坐係廚房門口監督住個焗爐等佢唔好偷懶.
攝氏二百度, 焗三十分鐘, 撻凍食得.
豬仔 : 媽咪, 你好靚呀.
豬仔媽 : 你地幾時變得咁有眼光架
仔仔 : 媽咪你幾時變得咁易信狗架
豬豬 : 好明顥我地只係係度賣口乖, 等你派餅餅啦.
豬仔媽 : !#$@!%#$^
仔仔 : 又係得果丁屎咁大粉....
仔仔 : 牙縫都攝唔到....
豬豬 : 媽咪到我未呀?
豬豬 : 都係果句, 搵食艱難....
熊熊 : 媽咪唔好唔記得我, 我坐定定等食.
熊熊 : 我食得好斯文.
熊熊 : 好好味, 可唔可以黎多粒呀.
豬仔媽 : 唔可以....
熊熊 : 唓...
熊熊 : 孤寒鬼~~~~~
整又俾狗鬧, 唔整又俾狗鬧, 不過我會繼續整既, 見到佢地坐係廚房門口傻笑等食個樣就夠曬滿足啦.
