Mission Impossible 9---等到妳回來之babe去絕育

新年快樂．

有無人認得我呀，我就係地盤狗ｂａｂｅ啦．
完全無怎象？唔緊要，去節目重温溫：＜小熊爸少男心事＞．

點解隔左成兩個月先再出現，說來話長．

話說自從抽水ｅｅ見過我一次咁大把之後，養我既回收紙場就搬走左，佢地有帶埋我走架，不過生活得唔係咁好，又掛住小熊爸，所以我就自己用左個幾月去搵路返返黎地盤．

返左去幾日就見到抽水ｅｅ又黎探我地，我記得果日係星期一，抽水ｅｅ咁岩係香港返工，佢話星期六放假就過黎帶我去玩．

果然星期六一早就見到抽水ｅｅ黎啦，不過同平時有ｄ唔同，佢身邊多左個叔叔，抽水ｅｅ只係錫左我一啖，無請我地食野，然後就細細聲同我講，叫我跟佢上車，帶我去一個對我有好處既地方．

夠竟車係咩黎架，我平時見到佢識郁，但係坐上係又會點既呢？我好奇咁望下。

點知突然間抽水ｅｅ係後面抱左我上車， 但係抽水ｅｅ呀，我地夾埋今朝先見過三次面咁大把，你唔好咁熱情啦，我地唔係真係好熟架咋 ，我掙住部車門，不過我又唔識發惡。。。

就係咁，我地跟左抽水ｅｅ同ｏｓｃａｒ叔叔上車，係初時有少少緊張咁，之後就唔得閒驚啦，因為我要睇風景呀．

坐左大半個鐘車，我抱抽水ｅｅ抱左去一個地方，佢地話果度叫獸醫診所．

之後就被人的左上去一塊金屬上面坐，好鬼凍呀，前面有ｄ數字識跳架，跳到十四公斤佢就停左係度，之後診所入面既人都話我要食多ｄ野喎．

原來診所入面仲有其他動物，我都未見過咁細隻狗既．

不過佢地話依個小朋友叫做貓，叫我要斯文，咁我就錫左佢一啖啦．

ｏｓｃａｒ叔叔話我後腳有少少拮，要幫我檢查下，隨便睇啦，唔使客氣架．

之後有個叔叔睇我ｄ牙肉話我好健康．

然後就困左我入籠啦．

之後我就唔知發生咩事，訓醒就發現自己多左個頭罩同埋無力無精神，仲好攰攰．

又坐車車返返去地盤．

抽水ｅｅ送左張送床仔同糧兜水兜俾我．地盤最錫我地既叔叔留左ｄ湯渣俾我食呀．

最緊要我ｈｏｎｅｙ小熊爸黎錫返我．

我都唔知中間發生過咩事，抽水ｅｅ話我做左個叫絕育既手術，以後就唔使再生狗ＢＢ，又唔使睇住佢地病或者俾車車死。叫我記得唔好舔肚肚，記住食多ｄ野同埋唔好嬲佢喎．

我好乖，抽水ｅｅ都好乖咁差唔多隔兩三日就黎睇我，如是者過左兩個幾星期．

前兩日佢話我靚左好多，我梗係錫啖佢啦，我最鍾意人讚我靚架啦．

ｏｓｃａｒ叔叔都讚我靚女呀，不過佢叫我唔好咁鍾意人，咁樣會有危險架喎，我完全唔明．連小熊爸都話Ｄ人會捉我地我打我地，當年小熊媽就係俾人捉走左之後一直都無返過黎，叫我小心Ｄ喎，但係我都係唔明呀。

不過抽水ｅｅ話就係因為我唔明，所以送左塊叫晶片既野俾我，希望可以保我平安喎。晶片係乜我唔知，只係知道乾雞片係好好味。

究竟點解我唔可以鍾意人？。。。。。。

後話：
十月中偶然見到新盤搬入，在小熊爸引路下見到甜美的ｂａｂｅ，聽說剛生了小狗。新生命的出現向來都是令人喜悅的，唯獨生活在地盤的狗生育總是叫人不安。還未找到ｂａｂｅ真正主人時回收場搬走，ｂａｂｅ亦失踪。

誰知到了十二月，ｂａｂｅ突然回來，比之前更瘦更親人，跟小熊爸仍時形影不離，儘管只是見過她兩次仍是要即時安排帶她絕育。行動前一晚才在內地趕回香港，準備捉狗工具時，我實在摸不著頭腦，隨了ｂａｂｅ不太怕人會跟人親咀外，對她我甚麼都不知道。ｂａｂｅ會有甚麼反應，我要帶最重型的工具嗎？我會成功嗎？誰知ｂａｂｅ就好比泡泡再現，抱她上車，去診所，絕育後用拖帶帶她回地盤，就連診所裡遇到的陌生人貓狗，均完全沒有問題。對那天才第一次見面的ｏｓｃａｒ也親熱得如見主人一樣。

我喜歡親人的狗，卻不想見到親人的地盤狗和流浪狗，這樣對他們實在是百害一利。對著ｂａｂｅ隨了破例給她植入晶片外，我做的就只係送上最深切的祝福。

沒有最好的事物，只有更高的要求，我不會奢望能為每個小朋友找到家，比上不足比下有餘的生活環境，ｂａｂｅ你要加油！我們愛妳我們祝福妳。

零一年一月九日更新 :

好景不常, 上星期接到地盤的來電, 說顧問公司不容許狗隻在地盤範圍, 會致電漁護處捉狗, 朋友仗義第一時間接BABE到家暫養, 現與七狗同居學習作家狗和跟人狗相處. 正待一温暖的家, 你或你身邊的朋友可以給BABE一個機會嗎?