豬仔廚房---豬仔生日會2010前傳

話說一年一度既豬仔生日會又黎啦, 今年因為工作關係, 生日會前一晚先至係廣州返香港, 所以除左生日蛋糕之外, 就只可以提早兩日焗定D餅餅之類既小食. 時間關係, 今年只係整左花年曲奇同埋吞拿魚餅餅. 主菜就係牛肝蛋糕. 

本來仲買左材料整肉丸同埋漢堡架.不過天氣唔穩定, 驚趴地未能如期舉行, 到時豬仔有排都食唔曬, 所以唔整LU.

花生曲奇超級易整, 兩杯全麥面粉, 一湯匙發粉, 一杯無添加花生醬, 一杯低脂奶,
(下面張相係舊年生日會整餅餅用既材料, 今年轉左用全麥粉)

 

攪埋一齊. 搓成一舊

 

拍扁佢再用模印餅餅出黎, 骨頭俾大狗, 心心俾細狗.

排得靚靚地, 入焗爐, 華氏三百七十五度, 焗二十分鐘. 攪掂

吞拿魚餅餅非常好味, 連咀刁既仔仔都從未抗拒. 

一罐185g既橄欖油浸吞拿魚, 兩杯全麥面粉, 半杯麥皮, 兩茶匙發粉, 兩湯匙植物油, 四分一杯水, 攪埋一齊. 搓成一舊. 好似上面d曲奇咁拍肩再印公仔.

入焗爐, 華氏三百二十五度, 焗二十分鐘. 攪掂

出爐記得用架放涼先好入盒盒呀

 

就係咁大堆頭既餅餅, 唔知夠吾夠分呢. 

當然唔可以唔提主角---牛肝蛋糕啦. 

唔好以為蛋糕好難整, 一如慣例, 我整得既都係無難度又好味既東東. 

材料 : 350g牛肝(或其他用類)切粒, 4隻雞蛋, 1杯全麥面粉, 半茶匙發粉, 半杯麥皮, 半杯植物油, 半杯南瓜(或其他適合狗狗食用的蔬菜).

放曬入攪拌機, 攪到好似泥漿咁, 倒入鋪好焗爐紙的蛋糕盤, 入焗爐, 華氏三百五十度, 焗六十分鐘. 攪掂

成品就係咁

 

如果有心機當然可以用乳酪或茅屋芝士鋪靚個面, 如果唔係好似我咁於D餅上去叫做好過無咁啦. 不過狗狗唔理個蛋糕咩樣, 只係知道好香好味....YEAH

 

點解一次過寫咁多食譜? 因為過年過節, 有假期超市又開, 再無藉口唔開焗整d小食俾狗地開心下啦....

 

天氣潮濕, 無防腐劑既自家製美食, 食唔曬記得keep係雪櫃, 唔係好以變壞架.