約埋都無咁岩

星期六去九龍，路經早禾坑，見有兩人兩唐狗。原來係佢地....

話想探二妹好耐，又話攪re-union，結果都係得個講字，終於約都冇咁岩，二妹就在路邊。

二妹同以前一樣咁可人，尤其是對人真係好熱情，三個月冇見，當然開心到跳起，熱吻當然少不免了。

突然見到影緊相果個都好似好熟bor，一於要去睇下。

『唔係嘩，咁耐無見，又係要sit，依D命令我二妹學晒la。』

『反埋肚過你開心下先』

『真係好忙呀，果邊又有熟人影相呀。』

『唔該抱抱，我大個女不過你都應該仲抱得我起呀。』

二妹哥哥boy boy。

估唔到可以見到二妹，佢已經大隻左了，身體好好，D毛又軟又滑，同boy boy又相處得非常好，佢主人最近再收養多一隻兩個月大的小唐狗，二妹有哥哥保護又有細佬陪玩，真係好幸福。

有事相求

豬豬 : 天氣咁凍, 同哥哥一齊訓梳化真係好C服, 不過有D野想同哥哥講....又唔知點開口....

豬豬 : 仔仔哥哥....
仔仔 : 咩事呀.

豬豬 : 我有件事想你幫幫忙, 但係又唔好意思...
仔仔 : 豬豬, 有咩事咪同哥哥講LAW, 哥哥幾錫你, 你知架.

豬豬 : 咁我唔客氣架啦喎.
仔仔 : 一家人客乜鬼氣呀, 咪收收埋埋, 快D講.
豬豬 : 哦....哥哥, 你可唔可以幫幫忙...唔好放屁呀.

仔仔 : 唓, 以為有咩咁事....
豬豬 : 咩喎, 如果你放屁, 我對到正, 好大件事架.

仔仔 : 無氣咁好氣, 我訓覺.
豬豬 : 咩喎, 又係你叫我即管開聲既....

好心呢, 福心呢....

仔仔：豬豬呀，有無發覺依排媽咪有Ｄ手緊呀。
豬豬：無呀，佢捉住我雙手果時我唔覺好緊喎。
仔仔：豬豬呀，我係話媽咪依家派零食無以前咁濶綽呀。
豬豬：哥哥你講開我又覺喎，以前一人一條雞柳，依家一舊兩份分。
仔仔：仲有呀，以前間唔使開罐頭我地食，依家我地只可以幫貓貓洗兜時有少少罐罐味舔下咋。

豬豬：咁點算好呀，我想成日都有成條雞柳。
仔仔：我夠想成日有罐罐食。
豬豬：唔想咁樣可以點樣呀？
仔仔：咁我地要自己更生，一於出黎楂兜搵食。
豬豬：但係我唔鍾意藍色兜呀。

仔仔：女仔真係麻煩，你唔用藍色咪用紅色ＬＡＷ。

豬豬：好呀，襯曬我條名牌頸帶。

仔仔：家陣我地出黎楂兜呀，仲講咩名牌呀。仲有呀唔好笑得咁開心呀，要好似我咁憂憂鬱鬱咁，先至有人可憐架。

豬豬：哥哥，你就話係影帝識扮野姐，我一諗起楂兜可以搵野食，我就忍唔住笑出黎啦。

豬豬：表情我就唔識扮啦，不如扮受傷訓係度呀。
仔仔：果然無改錯名呀，楂兜都掛住訓，豬咁懶呀。

仔仔：不過你又有你既道理，我地都要扮多Ｄ野先多Ｄ人可憐。
豬豬：不如地扮三腳狗呀。一齊收埋一隻手呀。
仔仔：你又豬唔曬喎，依條橋又幾好喎。

豬豬：好心呢
仔仔：福心呢
豬豬：可憐下我地依對三腳狗呢。
仔仔：我地唔收現金唔收咭唔收八達通，只係收雞條架咋。。。

我等著ming回來~~~

豬豬:：見到我一個狗跑沙灘既英姿，大家覺唔覺得差咁ｄ野．我唔係講仔仔哥哥呀，我係講我既好朋友明明呀．

豬豬：陳小明去左汶萊，不過睇佢既BLOG好似話識左新朋友喎，咁我都係度同明明交待下我既近況既。雖然出街玩就少左個會同我跳舞既朋友仔啦．不過明明你唔使擔心我一個狗太悶架，因為我都有其他節目既．就好似比斯仔啦，之前你黎度，佢一直埋唔到我身架，依家佢間唔屎會約我出街架，好似上星期咁，佢就叫我教佢游水啦．

豬豬：比斯都進步得幾快架，不過佢話想叫我教埋佢泳術改良喎，即係仲有排學架．

豬豬：當然我又會如當咁同仔仔哥哥去沙灘散下步．

豬豬：點知果次我同村狗ｍｅｍｅ玩緊撲擊果時，身邊出現左個靚雪橇，白白灰灰戴住紫色頸帶．

豬豬：我超級開心呀，以為你係汶萊返黎，俾個驚喜我．點知原來另有其狗呀．

豬豬：不過我地又幾夾喎，一齊玩下水戰．

豬豬：一齊係沙灘長跑咁ｌａｗ．

豬豬：你睇下佢係咪樣拍得住有你咁靚呢．

豬豬：明明，雖然你有你既生活我有我既忙碌．不過我都等緊你返黎同我玩呀．你個兩年合約完左好即刻返黎啦.

臭卡

卡卡 : 我係人見人愛既卡卡，媽咪暱稱我做臭卡．

卡卡：要保秘人見人愛當然有秘訣，就係經當去磨沙．

卡卡：海邊沙灘既新鮮天然沙效果特別好．

卡卡：唔好心急，要磨走曬ｄ死皮先得架．

卡卡：之後再用海水浸下SPA．

卡卡：上岸ｆｉｎｇ返走ｄ沙，就可以去結識朋友仔啦．

仔仔：咦，有個靚女係度曬日光廁喎．ｈｅｌｌｏ ｂａｂｙ～～～

卡卡：哈佬靚仔，我叫卡卡呀，我地一齊玩呀．

仔仔：嘩，卡卡，唔好咁肉緊啦．

仔仔：卡卡，你快過我啦．我唔可以蝦女仔架，咁要我咬不還口唔係好公平喎．

豬豬：哥哥，我黎幫口．

卡卡：仔仔，你有女朋友架，咁你仲出黎識女仔．
仔仔：豬豬係我妹妹黎架．．．

卡卡：原來係豬妹妹呀，咁我地繼續玩啦．
仔仔：唔好啦，媽咪叫我過去食雞呀．．．