星期六好節目---深涌

上個星期六, 十度都無, 我地梗係要去曬下太陽, 跑下步暖身啦,  於是我地就去左深涌啦, 深涌有幾正, 咪泊底架車係榕樹澳 (日泊$30) 再沿小路行半個鐘多少少....

雖然深涌塊草地好靚, 不過一d都唔值得欣賞. 深涌原本係一塊有生態價值濕地, 裡面有香港獨有既鬥魚仲有罕見既貓頭鷹, 俾大財團買起左, 想做哥球場渡假村, 偷步偷雞夾硬鋪曬草地, 又扮曬野話攪生態旅遊, 咪玩啦無曬原生植物鋪草皮叫生態, 政府後知後覺又見有人嘈唔敢批所以工程又暫告一段落, 以前聽講話耐唔時有保安係度趕人....香港既生態越黎越少人重視, 公共空間私有化, 政府保育side鬼氣, 人地攪完工程先出聲, 唔係官商鈎結真係搵鬼信....唉...

都係講返果日既片段...

沿住小路, 行行下就會見到片大草地, 草地有幾大, 你睇下豬豬係草地入面好似粒鼻屎咁細就知有幾大.....

星期六朝早有咩好, 咪無人無狗, 大家唔係返工就未起身, 我地就起劫喪跑緊啦.

你睇下跑到成身濕曬, 唔好以為佢地出曬汗呀
(狗地只係條脷滴口同埋腳趾隙出汗架咋)

係兩隻野唔知係咪凍到傻左, 見到水都跑落去....

阿豬仲坐係水度傻笑....

好彩識跳返上黎, 唔係我以為凍僵左架啦.

又好彩佢地keep住跑個天又keep住有陽光....

依張好攪笑, 睇落去好似狗地跑跑下變左隻左咁....彭彭變比斯, 比斯變豬豬....
仲變埋色....哈哈.

依張相睇落sasa好似瘦左好多咁,
睇真d先發現, 明明身邊既唔係肥sa係彭彭, 原來狗地玩chaning partner呀.

幾家狗地, 己經不分你我跑埋一碟.

不過狗地唔會認錯主人, 蘇菲都係咁嗲....

狗地跑下, 又做下model.

家長們抽下水影下相.

狗地們同朋友仔傾下計.

曬下太陽.

做下電免.

大狗細狗炒埋一碟, 成朝都唔使勞氣....爽呀.

聽日係彭福公園重開既大日子, 我地會朝早九點去等佢開閘, 大家有時間都一齊黎玩啦. 其實彭要玩唔係一定要去彭福公園, 不過彭福公園係狗界有一定代表性, 因為難得有公園會無"不准携犬入內"既告示, 其實攪乜鬼狗公園, 將公園開放俾人狗散步, 再加"請牽引狗隻", "請為狗隻便便善後"既提示咪唔使攪咁多野law.