豬仔廚房---蜜味芝心包(清雪櫃美點)

歡迎大家繼續收看豬仔廚房. 仍然係我靚仔主播為大家介紹.

今集既美食係---蜜味芝心包.

大家唔好以為我地咁幸福個個星期都有美點食呀, 查實今次係阿媽話要清雪櫃, 正確D黎講係阿媽話要阿爸清雪櫃, 於是阿媽就求求祈祈咁將雪櫃入面既存貨撈埋一盤放入焗爐. 都係果句, 難既我阿媽都唔慌會識整.

六至八塊白面包撕成碎塊, 二百克低脂茅屋芝士, 四隻雞蛋, 杯半低脂奶, 大半杯燕麥, 四分一杯蜜糖, 兩茶匙蒜蓉. 撈埋一PAT, 倒入個焗盤度, 華氏三百七十五度爐返佢三十分鐘食得.

循例介紹完, 又到左試食時間....香就幾香不過蒜頭味重左少少. 唔係好岩我口味....
(豬仔媽 : 衰仔, 俾D專業精神, 好似滔滔咁乜都話好鮮好滑好香好味咁得唔得唧!!!!)
(仔仔即時改口) 聞落好香, 唔使試都知一定好好味既唧.....

豬仔媽 : 你家下食定唔食呀....
仔仔 : 食左落口真係好鮮牛奶芝士味呀, 簡直想洗埋集碟佢呀.

仔仔 : 唔食由是可, 一食就返唔到轉頭, 俾多舊我得唔得呀....

豬豬 : 簡直好味到兩眼發青光呀.

二妹 : 咁我果份呢?

豬仔媽 : 上次有觀眾話你無儀態呀, 你同我坐得好好地先有得食.
二妹 : 坐定定啦, 係要細細啖咁食呀麻....

豬豬+仔仔 : 媽咪, 幾時再清雪櫃呀, 我地要幫手...呀唔係, 係要幫口呀!!!!!