白毛獸大鬧西沙公路

星期六晚朋友邀約飯聚, 驅車至西沙公路遇上大塞車, 心想不是撞車嗎? 車駛至意外現場, 原來唔係撞車, 係撞鬼!!!!

撞鬼囉, 點解有隻白毛獸係條西沙公路度散步架, 隻白毛獸唔驚車唔驚人唔驚狗, 光脫脫淨係戴住條蝨帶係馬路度散步呀, 佢真係散步架, 矇下矇下咁行下左線行下右線, 將前前後後左左右右既車全部都當隱形.....

於是成條路既車就要行下停下避下, 怕鬼左佢. 我係架車度望住佢都唔知好嬲定好笑, 咁岩今朝拖樂樂還俾佢主人時用過條拖帶條係車度, 咁即管盡下人事, 拎住條拖帶落車睇下引唔引到佢, 點知唔落由事可, 一落弊加火, 條路上面既司機乘客行人個個都怒啤我, 當左我係千古罪人好放隻狗係度散步咁....大佬隻狗唔係我架.

佢好合作咁唔理我, 不過問題唔可以唔解決, 無奶油俾佢繼續係條公路度散步架, 於是就爬左隻白毛獸頭係前面小路停低車, 拎左D零食引佢埋一邊. 隻白毛獸唔知係咪索左K, 走埋黎又唔係食D零食, 我一路引住佢, 豬仔爸就諗計點整條頸帶過佢, 拍戲都無咁橋, 路邊有條紥棚用既綁帶, 就是咪攬下佢順手綁個臨時頸圈俾佢, 即時上繩的左佢上車至算.

依隻白毛獸可能係元神出竅, 俾人上左繩都唔知, 見到車尾有阿二妹之前玩過既有聲波波就跳鬼左上車, 坐定定係玩波波, 閂埋車門開埋車都完全驚動唔到佢, 成程車係咪玩波波.....

我地係西澳的左佢上車之後, 行到西沙茶座, 見到對面線有架可疑既黑色房車, 撩路邊放狗既人講野, 直覺話俾我知, 佢搵緊狗, 架可疑車輛絕塵而去, 我地就搵個位調頭問剛才俾佢撩既放狗人士, 證實佢真係搵緊隻白毛獸. 車又追唔到車牌又見唔到, 唯有帶住隻白毛獸企係企路邊, 等架可疑車輛再次出現 ....真係樣衰到爆.....

好彩隻白毛獸矇下矇下, 有波波玩就個天塌落黎都唔理, 我地咪企下痞下坐下, 攞返佢個波波俾返個波波俾再搵返佢個波波, 再企下痞下坐下....

由天光等到天都黑埋. 架可疑車輛終於現身.

白毛獸既身世亦都時即解開. 原來架車入面既人只係白毛獸既鄰居, 話說佢地楂車返屋企途中見到隻熟口熟面既狗, 於是就打俾佢鄰居問佢隻狗係邊, 個鄰居話佢地出左去葵涌, 出門口之前就好似平日咁, 放左隻白毛獸自己出去玩. 佢鄰居都算唔話得啦, 即時兵分兩路, 一個楂車兜黎兜佢搵佢, 一個就返去睇下隻白毛獸係咪真係唔見左.

隻白毛獸原來住係企嶺下老圍, 我地的佢上車既地點係西澳, 即係白毛獸係西沙公路度渡左兩公里唔止....真係勢飛利....

我地係路邊等佢主人等左佢主人半個鐘唔止, 佢都止係去到大圍, 個鄰居無養狗經驗, 手無寸繩話佢可以照顧隻狗, 叫我地可以走先....唔好玩啦, 我唔想出到吐露港又遇返隻白毛獸係度散步呀, 我地話不如的佢上架黑色車度, 佢又支唔以對. 我地話不如幫你車隻白毛獸返屋企又係話吾使唔使, 等到個波到俾白毛獸咬爛左, 佢鄰居終於話因為怕隻白毛獸D毛同佢架車合體, 所以唔想俾佢上車....

唔好玩啦, 我個半鐘頭前出門口已經好趕時間架啦. 等到我地對腳餵飽左好多蚊, 塊面開始同天色睇齊, 佢先至叫佢太太上車抱住白毛獸等佢主人係大圍"趕"返黎....

隻白毛獸其實幾靚仔架. 個名叫做几仔, 唔知係咪佢個身型成張茶几咁所以叫几仔. 點到好啦几仔, 叫你主人唔好再亂放你, 整返個名牌俾你, 我唔想再係西沙路度遇到你呀.

如果你地有邊個識得几仔主人, 麻煩你話俾佢知几仔當日幾威水, 亦都麻煩你叫佢做下主人既基本責任呀唔該, 唔係次次都有個傻婆幫佢捉狗架....