三角芝士的舊事

三角芝士的故事既主角就係下面張相既靚仔，你認唔認到佢係邊個？
五年前我地第一次見到依個靚仔，當年佢叫ＢＯＢＯ，亦即係今日既仔仔。

你地根係以為抽水ＥＥ狗見狗愛，第一次見到仔仔已經俾係咁錫。你地估錯曬啦，當年既仔仔係街度流浪左一段時間，後來俾漁記捉左，多得餵開佢既人反應快救到佢出黎。但係因為佢地住果度唔養得狗，所以另一個餵開佢既人，又即係豬仔爸既同事，就安排左佢長住係狗酒店，一住就住左半年啦。

長住狗酒店，對人對狗都唔太好，一黎狗狗有個家最好，二黎都人既荷包都唔太好。於是豬仔爸既同事就幫佢搵屋企。

依個衰仔鬼咁有性格，見到佢既救命恩人就搖曬尾，見到狗酒店既職員就開心到蹼過去錫人地。狗酒店既職員個個都讚佢，又乖又乾淨，咁耐都未整污糟個自己間房。佢地明知我地想帶走仔仔，帶走佢地既固地收入都咁讚佢，睇黎仔仔真係好得人心。

之但係個衰仔見到我地豬仔爸就好似鬼見愁咁，我地行近少少佢就走開，仲要走對角有咁遠距離保持咁遠距離。迫左佢埋牆角，豬仔爸伸隻手埋去個衰仔仲要Ｅ牙。可能捉狗隊係男人，所以我都勉強摸左佢兩下。佢貼實個網痴實個地驚恐我會蝦佢咁。

。。。原來我當年雙手同大脾都無依家咁粗 >_<

第二次去探仔仔我地梗係有備而戰啦，就係帶埋肉乾氹細路，依個為食仔當年竟然有性格都唔食。但係就睇中左當日豬仔爸見特價買俾我食既三角芝士。話說當年去朋友屋企痴飲痴食，試過個ＣＨＥＥＳＥ　ＢＯＡＲＤ就成日話鍾意食芝士，咁岩果日見到到期，特價五蚊咪買囉，咁岩個衰仔又鍾意食喎。

後來，我地係西貢百佳又見返條芝士，於是我地又等佢特價，一等就等左大半年，到期前兩日都仲要賣成三十蚊。算啦都半價啦，買就買啦，就當慶祝我地同仔仔相識五週年啦。不過邊日係正日我唔記啦。

仔仔：當年Ｄ瘀野你同我唱曬出黎，我仲有面見狗既。
豬仔媽：我都係講事實咋喎。

豬豬：當年我都未出世，仲咪又要我同芝士影合照呀。
豬仔媽：講咁多野，係咪唔想食芝士先。

其實依隻芝士好咸，真係唔應該俾狗食。不過食少少開心下啦，唔知仔仔記唔記得陣味呢，不過我就好記得當年佢終於肯係我地雙手度搵野食果種開心既滋味。

仔仔：我使唔使襯返舊芝士，擺返當年咁ＣＯＯＬ個ＰＯＳＥ呀。

豬仔媽：咪扮野啦你，見到野食你個樣唔係烚熟狗頭咁既咩。

豬豬乜都跟哥哥學，包括個烚熟狗頭樣。
（拿，講明呀豬豬個低能樣係跟仔仔學架，唔好借Ｄ椅又話係我教到Ｄ狗低低能能呀。）

由第一次餵仔仔開始，佢一直都咁斯文。

一直都咁温柔咁舔乾淨你雙手。（如果果Ｄ係好味道野食既話）

豬豬都係跟仔仔學到咁温柔。

不過清兜清手既功力已經勁過仔仔，成日想幫仔仔清兜。

你睇下佢地兩個，想錫少Ｄ佢地都唔得。

當年見到我地調頭走既狗狗，今日見唔到我地唔肯走。
當年的親佢上車就驚到賴尿既狗，今日車門未開盡就要夾硬跳上去。
話長唔長，話短唔短，咁就五年啦。

仔仔。。。錫曬你。。。