快快樂樂回家

樂樂已經係上上個星期六返左屋企啦, 不過因為忙, 又因為哎烏失機無神傻下傻下, 所以一直都未有報導.

走之前梗係要親下先得架, 豬豬唔知係咪見到樂樂反肚多, 依期成日走埋人身邊訓底等你摸佢, 一停手就好怪咁望住你.

豬仔爸話佢D呀太污糟, 雖然咬左幾次骨, 都要刷返下棚牙先得. 不過太多牙石, 牙太敏感, 出曬血.

好黎好去, 食過WELCOM CAKE, 走都要食多件FAREWELL美點.
仔仔 : 個樂樂雖然成日嘈住我訓, 但係多得佢我都多左D好野食.

樂樂唔止喵住我地訓,呀, 仲要係成村人都聽到, 好彩D鄰居厚道話唔大影響佢地訓, 仲幫樂樂改埋名, 改左咩名? BARKIE. 話說佢地以前鄰居隻黑色拉布拉多叫BLACKIE, 樂樂成日嘈住曬, 所以就叫佢做BARKIE.

不過隔離屋黎渡假果家法國人就慘啦, 佢地成晚都訓唔到, 第二朝果家兩好可愛既小妹妹好關心好擔心咁走黎問樂樂係咪有咩, 所以咸足成晚. 當佢地知道樂樂唔見左主人就話佢好可憐, 見親都走黎摸下佢.

豬豬 :媽咪, 舊美點好似細舊左少少喎....

人地話少年不知愁滋味, 樂樂竟然係老年不知悉知咪, 見親佢都係傻,笑, 好食唔好食大舊細粒都係笑得咁開心.

我地帶樂樂返西貢社區中心等佢主人. 佢主人終於出現啦, 原來樂樂真係足十歲架, 當年有個外國人係英國空運左對拉布拉多黎香港, 後黎唔知點解唔要, 樂樂就搵左好耐都搵唔到人收養, 於是佢主人就收養左佢.

樂樂真名叫BILL, 主人有辦齊手續續牌轉名, 但係唔知點解, 第一次聯絡漁記時佢地竟然搵左舊主人成九年前既資料出黎, 舊年報失轉牌等資料竟然無SEARCH出黎.

樂樂主人俾左D段片我地睇, 樂樂同一隻白色康狗一齊住, 生活環境好好, 但係佢地咁岩去左幾日旅行, 屋企既老人家咁岩出去丟完垃圾無閂好道閘, 咁岩又大風吹開左, 樂樂就左出去.....

要say goodbye啦, 黎多個big hug啦.

影多張靚仔相.

個名牌同蝨帶就送俾你做紀念品帶返屋企啦,

樂樂主人話樂樂以前有個軍牌有電話架, 點知走失左, 有人打電話俾佢話隻狗係佢度, 但係又唔講幾時帶返隻狗俾佢, 過左一段時間漁記就話執到佢隻狗. 於是嬲起上黎唔再俾名牌佢戴, 我地估樂樂主人驚我地問佢攞錢贖狗, 所以一開口就話唔俾返隻狗佢都無問題,

依D就叫做緣份啦,

樂樂, 多謝你陪我地過左一個非常快樂既兩星期. 以後唔好再週圍走, 唔係次次都咁好彩架.