因禍得抽

明明唔係黑色星期五，點解我會咁黑架．

話說同事食完飯返黎，走埋黎問我：”有無人話你知，你架車條尾軚中釘漏曬氣，頭軚無乜氣呀”．唔講由是可，一講弊傢伙，話說我朝早係馬鞍山出吐露港聽到FeiFei聲跟住我架車，己經有d驚，但係當我開快d撇甩旁邊架大校巴就無左聲，咁我就以為係隔離架車漏風啦．於是就快快樂樂咁繼續開車啦，餵完狗完全唔知個軚無曬氣咁繼續返工．原來己經出事．．．

邊個放粒鏍絲係條路度呀大佬

好彩我係熟手技工，三兩下手勢就換左條軚出黎．

但係一路換軚我就一路陰陰咀笑，因為我知道去到車軚公司，就會見到汽車零件舖既靚仔啦．話口未完就去到啦，車泊好眼尾就sau到佢啦．

佢換左新裝，型仔仔到爆．

抽水姨姨真係狗見狗愛呀（唔計Cola）

搖曬尾

錫我

枕個頭頭係我隻腳度

你睇下我地幾老友．

佢仲開心到跳起身同我跳返Part舞添呀．

有好多人都覺過做車房狗是生不如死，Boby真係超級幸運兒．

我不奢望所有車房狗都好似Boby咁幸福，但願所有車房狗都享有他最基本狗權．

有吃有喝，有瓦遮頭，有病可去醫生，獲得一生一世的承諾，相信無人唔同意這是基本狗權吧．