母債子還－－－步行籌款

父債子還大家就聽多得，點解會係母債子還．話說我仔仔既媽咪深明出得黎行遲早要還依個道理，所以佢星期日就帶我出黎幫佢還債啦．大家唔使估估下啦，話說媽咪平日抽狗地水抽得多，今日佢專程帶我地出黎俾人抽水，順便幫佢還下債喎．

剛剛既星期日，Daddy Mami帶埋我同妹妹我地接埋公公一齊去玩，係呀就係教研中心既步行籌款啦．雖然首要目的係幫教研中心籌募經費，但係幫媽咪還債都好重要架．

大隊終到啦，成三架旅遊車呀，屎啦屎啦，我仔仔今次一定渣都無得剩啦．

豬豬因為細膽，可以括免，所以我仔仔唯有一夫當關面對千軍萬馬．步都未起，我就俾好多哥哥姐姐弟弟妹妹叔叔姨姨圍住呀．之但係我仔仔咁靚仔，佢地見到我又點會忍得住手唔抽水呀．

雖然我黑古甩凸，嚇親小朋友．（你睇下後面個小妹妹個樣幾驚）

但係經過小妹妹身邊既哥哥示範同佢爸爸既鼓勵，佢終於勇敢咁伸出左佢既手仔啦．嗱你地唔好再嚇小朋友啦，我地狗地真係好善良架，我好想個個小朋友都好似個小妹妹咁會黎同我地玩呀．

嘩，個個都爭住摸，依次真係乜債都還曬啦．

俾人抽完一輪水，終於可以行啦，點知有個小朋友見到公公拖我地咁型，又心思思想拖埋一份啦．佢以為我地可以拖佢上山等佢慳返d力喎．

於是佢又爭位拖我地，我地梗係乖乖地咁行啦．

拖拖下佢仲請我地食雞呀．你睇下我個樣幾開心．

 

佢仲想同我地合照，我地交足貨幫佢影左張劇照，之唔係向左走向右走囉．

 

沿路仲有個係咁抽我地水既叔叔，我都好喜歡佢架，好可惜佢身邊有個唔識野既姨姨，係咁話我地陰公，熱死狗喎，其實我地身體適應能力好強，加埋沿途幫我地淋水降溫同俾水水我地飲既媽咪，我地不知佢享受．可憐依個姨姨曬少少就皺曬眉頭，希望佢唔會因此多幾條皺紋啦．（我地厚道，係唔會登佢相架）

  
終於到終點，我地又見返舊年當我地係床咁訓既小朋友，佢好好人呀，一見到我地就走過黎俾水我地飲．（媽咪當然乘機抽佢水啦）． 但係佢無舊年咁熱情，唔知係咪大個左返左學俾老師教壞左．

公公餵我地飲水水呀．

 

回程既時候，我地又見到舊年一齊玩過既豆豆小妹妹同Billy狗狗一家，豆豆叻左好多呀，完全無驚我．

就連鏡頭佢都唔望，係咁抽我水，唔知佢大個左會唔會好似我媽咪咁變左做抽水姨姨呢．今日咁樣俾人抽水法睇怕都幫媽咪還債還得七七八．

突然間，唔知邊度又跑出隻積羅素，佢一見到豬豬就走埋去錫．

媽咪二話不說就成隻抽起狗啦．

連積仔身邊既八哥B佢都唔放過，人地得八個月咋．

依頭幫佢還債，依頭又走去抽水，睇怕我依世狗都要係咁幫媽咪還債架啦，各位哥哥姐姐叔叔姨姨，你地隨便啦．