開快車

距離出發得返兩個星期，突然醒起好多野都未整好，不過我懶左咁多年，屎急先開坑己經係習慣，片到埋身啦黎咪焗住開快車．

對於裝備，我採取既策略係寧濫莫缺，唔知狗地怕唔怕凍，所以都係要買定件保暖衫先．上網見到件好型仔，就連埋睡袋一次過訂．

豬豬：媽咪，件衫係咪我架，軟綿綿好舒服呀．等我著上身試下先

豬豬：媽咪，我對甲組腳塞唔落呀．

豬豬：著左件衫呼吸仲好似有少少困難．
仔仔：梗係啦，件衫就黎爆開啦．連妹妹都唔岩，我咁健碩更加唔使諗啦．

豬豬：媽咪，你無幫我地度身先去訂衫既咩．

豬仔媽：我梗係有幫你地訂身先訂啦，不過特價野（特左都唔平）通常都斷碼，岩你地著既又無貨，咁咪買左至算law．我見佢個model著得好型架，豬豬，你俾心機瘦身咪得law．

因為無樹立瘦身榜樣俾豬豬睇，為左件衫唔好得個擺字，唯有去改裝啦，夏天家政行無抓毛賣，要剪我件抓毛外套我又唔拾得，好彩小花之前俾左件抓毛衫我，兩個衫袖既長同濶都岩岩好．

買多對魔術貼，拿拿林開快車．．．

登登登登，就係咁加多塊布係背脊，再剪走原身既衫袖，FIT曬．

豬豬：媽咪，我係咪可以做瘦身代言狗呀，唔岩著既衫依家有鬆呀．
豬仔媽：豬豬，係件衫大左唔係你瘦左呀．

仔仔：我覺得我型仔左有自信左呀．

仔仔：豬豬，你話我係咪好靚仔呀．
豬豬：仔仔哥哥，你好型呀，我忍唔住要錫你一啖呀．

豬仔公公生日快樂

依幾日媽咪好忙呀，加上佢懶到唔可以再懶既性格，咁多日都唔出blog，睇黎又要我仔仔親自寫blog啦，廿六號星期二，Daddy媽咪留底我地成班小朋友係屋企自己出左去食晚飯，因為公公生日，公公話要去酒樓食飯慶祝，所以狗地無份．但係慶祝又點可以無豬仔份喎，於是乎我地就現身於公公張生日咭度啦．

張相係公公同叔公細個時影架，Daddy媽咪買左個電子相架俾婆婆同公公做禮物，所以就同Aunt Cat翻拍左好多舊相放入相架，Daddy話咁多相無狗地份唔成樣子喎，於是就加左我同妹妹落去啦．

仲有豬豬同婆婆同Aunt Cat既合照呀

依張就係豬豬陪媽咪同Aunt Cat打波

公公生日快樂．下次切蛋糕唔該叫媽咪打包件俾我同妹妹食呀．

豬仔驗血合格及申請出入境時間安排要點

前後兩個多月的等待和焦慮，仔仔豬豬最終到得到各自的瘋狗症抗體的合格報告．

豬豬仔仔分別在七月初到診所抽血，並安排送到外國的外驗所在測事，三個星期後，報告回來了，仔仔合格，豬豬卻不合格．

當然我們早有兩手準備，就在抽血當日己替豬仔各打一枝加強劑，這樣豬豬就可以在打加強劑後一個月再安排驗血，到了上星期六合格的報告回來我們才深深的舒了一口氣．

之前有朋友問若果豬豬第二次報告不合格怎算，老實說我不知道亦不敢想，孤注一擲地信她會合格好了．

其實我們在準備旅程的最初只著眼在加拿大入境的要求，而完全沒有留意動物出境後免拘留的繁複要求．當中包括了瘋狗症抗體測驗．從抽血到報告至少要一個月的時間，因為香港政府認可的化驗所全都在外國，即使安排速遞送件再加上急件的蓋章也要三到四個星期時間．而且報告也未必一定合格．即使打加強劑亦要再待一個月才可以再抽驗．

安排驗血時間考慮的重點：
１．驗血報告有效其一年
２．由抽血到報告完成需時約一個月
３．居民免拘留證明及動物入口的特別許可證則有效半年
４．申請特別許可證需要五個工作天時間
５．打瘋狗症防疫針後要至一個月才可以安排驗血．
６．打瘋狗症加強劑最好在前一針一年後才打
７．只接受了一次防疫注射的狗隻驗血不合格的格會較高（如豬豬）
８．安排狗隻回程機位時，航空公司會要求提供特別許可證

QQ無罪咋屎有理

我係阿Q，狗如其名梗係Q爆啦，點知就係因為生得Q就累左我啦，話說星期六有班叔叔EE姐姐上左黎狗狗竇，睇到佢流住口水個樣我就知無好野啦，我俾佢地圍住抽水呀，真係屎都唔得掂．

就是為求自保，我打心一橫，一於扮屎！！！

AB媽：人黎呀QQ屎左呀！！！
QQ：真係唔知我演技好定佢傻傻地，咁到呃到佢喎．

抽水EE：等我檢查過．
QQ：唔係呀，抽水EE你識唔識架唔好扮曬野喎．

抽水EE：唔好咁多抽住水先，一路抽一路搵幫手．．．
QQ：唔係呀，屎左都要抽．咁我扮屎黎做咩呀．

豬仔爸：等我檢查過，真係無呼吸無脈搏喎．
QQ：梗係啦，你話我係咪可以同你齊名，攞奧斯卡呀．

豬仔爸：情況危急，睇黎要幫佢施行急救，心外壓呀．
QQ：喂．．．唔好呀，爆骨架，我有心跳架．

豬仔爸：係喎有脈搏，即係不省狗事啦，急救學話拮佢個鼻就醒架啦．
QQ：救命呀，真係俾佢玩屎呀，活狗當屎狗醫．

QQ：我醒返啦．

特工：屎仔包，我晨早知你扮曬野啦．你捨得醒呢咩．

抽水EE：醒返咪好law，咪鬼鬧佢啦，阿Q，EE抱抱錫返．
QQ：睇黎我點都係劫數難逃架啦．認命啦．救命呀．．．

打風硬食西北風

仔仔：豬豬，今日打八號風球呀，我地都係躲係個飛機籠入面安全d呀．
豬豬：仔仔哥哥，咩係八號風球呀．
仔仔：總知吹好大風，個海有白頭浪無曬船，路上面無車無巴士行．
豬豬：所以媽咪唔使返工？
仔仔：係呀．
豬豬：媽咪唔返工？？咁我地食咩呀．
仔仔：你聽唔到收音機話今日吹強勁西北風咩，我地有排食啦．

仔仔：嘻嘻，呃完細路．媽咪，我聞到有零食味呀，阿妹話佢今日食西北風，你俾曬我食得架啦．

豬仔媽：衰仔，你當我聾定當我傻呀．

今日吹西北風，為左順應風向，我地食西洋零食．
兩包兩個人食一包兩個狗狗食．佢地就係當年布殊一路睇波一路食食到哽親，近年拍得住薯片咁受歡迎既小食－－－咸脆圈啦．

型狀都一樣，聞落去都係咸咸地，問你點分邊個人食邊個狗食．

連包裝都差唔多問你點分．

小黑豬就識分啦，叻仔．

那年村狗特別多

租住這裡不經不覺己三年了．最初村裡只有兩頭村狗，都是全啡，住在停車場．一男一女，出雙入對，喜歡人，勉強可以摸他們一兩下．男的年紀不小，跟仔仔每次碰面都要較量一下．女的喜歡我們，跟出跟入的．

一天男的身受重傷，我沒有任何養狗經驗，沒有朋友指路，又不能走近傷狗為他料理傷口的我，只能給他多點食物，看著他的傷口一天比一天大，走路越來越拐，沒有力氣再跟仔仔較量．．．再沒有見到他了．

剩下狗女一個，我們亦只有仔仔在身邊，於是給狗女起名為囡囡．仔仔成了她唯一的狗友．

一天，村裡忽然來了四頭幼犬，也是全啡的．因著食物和喜歡親人的天性，他們一一從停車場搬到了我們屋前，遇上下雨和酷熱，他們就走到隨意走鄰家的屋簷避雨避暑．那時整條村除了我們就只有一戶人家和兩戶租客主只來渡假．

早上起來，推門出去除了海景和山脈外就會有這漂亮的場面．囡囡明顯就是他們的領袖．

四小狗喜歡人卻不許人碰，沒有太多跟狗相隨的經驗，我連他們的性別也攪不清楚，只認得一個小朋友總是給其他狗地欺負，我給他特別多照顧和食物，叫他作寳貝．

還有一個生得很像狐狸的，我叫他作狐狸仔．
派飯的時候大家都搖著尾走來，人和狗都享受這時刻．

那時還享有自由行權利的仔仔就是他們的大領袖，每當我們行山，整村村狗跟著一起去，多熱鬧多威風．

不知原因，也沒有辦法，一隻又一隻的消失，先是一個不沒名的，然後是狐狸仔，到去年連連寳貝都不見了，四小狗只剩下一個女孩，先後生了兩窩孩子，絕育後得名MeMe．從此跟囡囡形影不離．

至於囡囡，早在我們搬進來以前己有一外藉夫婦帶她絕育，而這對夫婦亦將在今年底將離開香港．

餐士吉士補濕生日會

上星期餐士開生日會呀，媽咪話帶埋我地去參加，順便去補下濕．我同妹妹都知架啦，媽咪有咩叻呀，梗係又去抽水啦．可能又因為媽咪做野手腳太慢，所以老細唔俾佢放假，我地又錯過左下晝既沙灘派對，天都黒齊先去燒烤會場．

餐士吉士佢地實在太好啦，等埋狗地先切蛋糕，我地有蛋糕呀．

仲有miu媽親手整既美味，真係不枉些行呀．

媽咪當然依然專注佢既抽水事業啦，Dedi小朋友第一個被揀中，佢己經叫唔好仲及媽咪手手等佢唔好亂黎，點知媽咪視一切為無物照抽．抽下抽下Dedi就學識左享受啦．

仲有美麗呀，美麗既美色實在太誘人，媽咪唔捨得放手呀．

除左美麗之外仲有美子，真係狗如其名，好靚女呀．

其實仲有靚靚MiuMiu架，不過daddy唔識分餐士吉士同MiuMiu所以影漏左．

個派對仲有唔少靚仔，佢同我一樣叫仔仔，睇黎叫仔仔既狗地都係靚仔．

主角餐士吉士睇幾欣賞豬豬妹妹咁喎．．．

我見媽咪抽水抽到七七八八，以為都係時候返屋企覺覺豬啦，點知媽咪話佢未補濕喎，攪到我一頭霧水，佢抱起餐士哥哥之後，我就明曬啦．

餐士哥哥不停咁舔佢塊面，無錯係不停咁舔．唔怪得知媽咪話要黎補濕啦．

就連餐士個仔吉士一樣咁嗲，媽咪叫我地好好跟佢學習下嗲功喎．

最出人意表既人，連平時只係齋影唔抽既daddy都忍唔住話要補濕呀．

餐吉家真客氣．有得玩有得食之外仲有禮物收．睇下係豬豬匙扣電筒呀，係為豬豬度身而設架．

仲有我為食仔仔至愛既零食呀．

相信大家都唔抵得我地咁開心，但係故事尚未完結，daddy抽到大奬，貓貓見到爭住幫手拆禮物．

嘩嘩嘩．．．有排食啦．連小貓三四都好鍾意份禮物．條絲帶佢地玩左成個星期都仲玩得好開心呀．

識到咁多朋友仔真係開心啦，仲要持別多謝餐士吉士一家既精心安排．

餐士，生日快樂不在話下啦，祝你日日開心笑到見牙唔見眼．