為食龍虎會

各位朋友，又係我仔仔呀，係剛過去既星期日，即係復活抽水受難日既翌日，我又要對左另一個傷痛既日子．詳情大概係咁．．．

星期日一早，我同妹妹又跟DADDY MAMI去聖堂，我地唔入得去唯有係車度等啦．之後就去探下媽咪最錫既地盤狗，再之後就坐丁丁叔叔既大車出發去探砵砵豆豆啦．多得丁丁叔叔既車車，我咁大個仔第一次坐車車係DADDY MAMI一齊攬住我架咋．

到砵豆家望住DADDY MAMI食左好美味既午餐之後，我地大隊人狗就向龍虎山出發.

有成五個人六隻狗呀，你話幾熱鬧．

依對靚靚既姐妹花就係砵砵（左）同豆豆（右）啦，佢地又靚又乖又精靈又活潑，雖然佢地都佢地不堪回首既經歷，但係一切都己成過去，你睇下佢地幾精靈．

之後就有嘟花兄妹啦，嘟嘟係我地老街坊，花花就係媽咪返工附近既地盤出世，但係睇佢地今日既英姿真係講都無人信佢地係村狗同地盤狗呀．

輪到我同妹妹，依兩個黑古甩凸既鄉下仔啦，成日都見到我地怕你地悶呀，俾個背面你地睇下啦．

上到龍虎山就遇到好多新朋友，首先就有久仰大名既栗子啦，佢狗仔細細但係絕對係叻仔一個，完全係話頭醒尾樣．

又有為食又爛玩既薯仔，不過可能佢係獨仔，所以差左少少禮貎．

仲有高貴大方既Annebel同nikko

講左咁耐都未入正題．．．
話說大家都知道我仔仔係一個為食狗，基本上我認第二都無狗敢認第一，但係今次我真係徹徹底底的被比下去．．．

你睇下我依個曾經係戰無不勝既為食樣，不過都己成過去，因為我輸左．

一開始，我係度等零食既時候，身邊好唐突咁多左個小朋友一齊等食．

佢就係花花，小朋友咁可愛，大家都俾多d佢食．於是我輸左．

到我又搖曬尾等食既時候，豆豆又飛身請吃，我邊有豆豆甘敏捷，於是我又被比下去．

就連唔敢排隊等零食既砵砵都就嗲媽咪，我無佢咁甜美可人，於是媽咪手上面既又靜靜咁分左份俾佢．

雖然我又無栗子咁可愛

又無豆豆跑得咁快

其實論經驗論技巧我基本上會帶出成條街．好似咁，我離遠都聞到依個姨姨個袋入面根本無野食，但係無知既小朋友就圍曬過去．我當然無咁傻啦．

但係即管我係第一個跑到派零食既媽咪面前，班小朋友根本唔識秩序點寫，仲用佢地細細粒既身軀捐過我排係我面前．你話我仲邊有掟企呀．

佢地仲誇張到因為爭食而大打出手．我甘斯文根本唔會同佢地打，所以都唔會爭到野食．

就連我地個同細膽鄉嘟嘟都食到舔舔脷，偏偏我．．．偏偏我無．

最後唯有狗棄我取，無人玩既玩具我咬咬咬咬咬．．．

咬咬下，豬豬走埋黎
豬豬問：哥哥，你做咩咁無心機呀．

仔仔心諗：我點都唔會開口答佢架啦，佢梗係想我一開口跌埋個玩具出黎等佢可以攞左去咬．等我扮訓著先

豬豬心諗：哥哥點解唔應我既，原來佢訓左，咁我唔嘈佢啦，仲諗住話佢聽媽咪叫我地過去食野，話留左份大既俾我地兩個喎，咁我辛苦d一個狗食曬佢啦．

豬仔媽格言：狗蠢無葯醫．．．唉．