端午節的工作犬

端午節係假期，當大家仲係度訓緊覺覺既時候，我仔仔大清早就帶埋兩個妹妹去西貢市執行任務．我地當日既工作好繁忙，不過作為人類既好朋友，服務人群係我地既使命呀．

今日我地一家上下就係山海龍舟隊既支援小隊．媽咪舊年係佢地既一份子，不過為左有更加多時間倍找地玩，今年佢就無再參與練習啦．

我地第一個任務係運動心理輔導員．

主要職責係陪各選手玩，俾佢地抽下水，減低佢地出賽前既壓力．

到佢地出賽既時候．．．

我地當然要幫佢地打氣．

與此同時，我地就化身為守衞犬．看實參者既行李．

除左行李之外，當然仲有山海龍既物資啦，包括支裝水同運動補充飲品．

到佢地比完賽啦，當然又係抽水時間啦．

咁辛苦完成賽事當然要玩下輕鬆下，就算當我地係馬咁騎都無所謂架．

明明己經好忙架啦，點知仲有額外任務喎．就係幫小朋友同家長克服狗狗親近障礙啦．坐左成朝，先得三個小朋友同我地玩．

其中有一個超叻小朋友，佢爸爸觀察左一陣，又係我地媽咪鼓勵之下，就放左小朋友一個人黎同我地玩啦．

小朋友既眼睛係雪亮既，佢係我地三個中間行左個圈之後，就揀左親善大使泡泡黎玩．蚊毛扯尾不達止．

仲成個伏係泡泡上面．泡泡不單止無所抗，仲笑得好開心呀．

然後就到己經縮埋左係一角既豬豬啦．

豬豬雖然都仲係咁細膽，但係無夾住尾巴走呀．

最後到我仔仔啦．咪睇佢人仔細細呀，真係活力無限架．

蚊毛拍頭扯尾當我鼓咁拍，仲越玩越開心，仲叫埋佢爸爸佢陪佢一齊玩．

小朋友拍我頭果時，佢爸爸有小小驚架，不過佢可能唔知平時媽咪拍我頭仲大力過小朋友十倍．所以我仲係笑笑口架．

最後仲攬實我唔放唔願走添呀．

於是我地三個小朋友就過左一個又充實又有意義既端午節啦．媽咪見我地咁乖，就決定第二日帶我地去玩啦．但係由於屋企條電話線斷左成個星期，上唔到網，上載唔到去沙灘既相，真係唔知幾時先寫到blog啦．

大家想快d有相撻有blog睇，就幫我地打去電話公司度跟進下啦．